🌍 शनिशिंगणापूरमध्ये देवस्थानकडून मानधनावर पुजारी नियुक्त.पुजाऱ्यांना भक्तांकडून रोख स्वरूपात अथवा ऑनलाईन रक्कम स्वीकारता येणार नाही.मुख्य कार्यकारी अधिकारी गोरक्ष दरंदले यांची माहिती.

Updated by स्टार वन न्युज मराठी ™ 

9 सप्टेंबर 2025

🌍 अहिल्यानगर ✍️

शनिशिंगणापूर

 विश्वस्त मंडळाने मानधनावर पुजारी नियुक्त करण्याचा निर्णय घेतला आहे. या पुजाऱ्यांना भक्तांकडून रोख स्वरूपात अथवा ऑनलाईन रक्कम स्वीकारता येणार नाही तसेच हवनसाठी देवस्थान आता ११ हजार रुपयांची पावती भक्तांकडून घेणार आहे. देवस्थानचे मुख्य कार्यकारी अधिकारी गोरक्ष दरंदले यांनी ही माहिती दिली.

देवस्थानकडे दीर्घकाळ सेवा देणाऱ्यपुजाऱ्यांना आजपर्यंत भक्तांकडून दक्षिणा मिळत होती. आता या पद्धतीत बदल करून पुजाऱ्यांना मानधनावर नियुक्त करण्याचा निर्णय देवस्थान विश्वस्त मंडळाच्या बैठकीत घेण्यात आला. देवस्थानच्या पुजाऱ्यांनीही तसा मागणी अर्ज विश्वस्त मंडळाकडे केला होता. पुजाऱ्यांची मानधनावर नियुक्ती करताना नियम व अटी घालून नियुक्ती देण्यात आली आहे. त्याची अंमलबजावणी काल, शनिवारपासून सुरू करण्यात आल्याचे दरंदले यांनी सांगितले.

या पुजाऱ्यांना ३१ हजार रुपये व २१ हजार रुपये मासिक मानधन दिले जाणार आहे. पहाटे ४ ते रात्री १०.३० या कालावधीत दोन पाळ्यांमध्ये पुजाऱ्यांनी सेवा द्यायची आहे. पुजाऱ्यांनी भक्तांकडून रोख स्वरूपात अथवा ऑनलाईन रक्कम करायची नाही. एवढे करूनही भाविक पुजाऱ्यांना दक्षिणा देत असतील तर पुजाऱ्यांनी ती रक्कम न स्वीकारता तेथील दानपात्रात टाकण्यासाठी भाविकांना मार्गदर्शन करायचे आहे. तसेच कोणी भक्त पुजाऱ्यास वस्तू स्वरूपात दान देणारा असेल तर त्या वस्तू पुजाऱ्याने न स्वीकारता देवस्थानच्या देणगी विभागाकडे जमा करून रितसर वस्तुरूपाने पावती घेण्यासाठी भाविकांना मार्गदर्शन करायचे आहे.